مهندس مدني سابق، سبت الشغل سنة ٢٠١٧ عشان أعمل محتوى تعليمي بالعربي. بتكلم عن الإنجليزي والمذاكرة والإنتاجية وتنظيم الوقت، وكل حاجة بنشرها بجربها بنفسي الأول.
تعلم نوشن من الصفر حتى الاحتراف
هتتعلم إزاي تستخدم نوشن في تنظيم حياتك بالكامل وإدارة كل مشاريعك، وإزاي تستخدم البلوكات المختلفة في كتابة ملاحظات غنية بالنصوص والصور والفيديوهات والقوائم، وكمان قواعد البيانات اللي بتخليك تدير مشاريعك وبياناتك بسهولة.
اتولدت في شهر سبتمبر عام ١٩٩٢، مش هقولك يوم ايه عشان ما تعرفش معلومات كتير عني وتسرق حسابي البنكي :)، اللي شايلني في الصورة أبويا ربنا يبارك في عمره وكنا في أرض كرنب جنبنا.
اتولدت في شهر سبتمبر عام ١٩٩٢، مش هقولك يوم ايه عشان ما تعرفش معلومات كتير عني وتسرق حسابي البنكي :)، اللي شايلني في الصورة أبويا ربنا يبارك في عمره وكنا في أرض كرنب جنبنا.
سنة ٢٠٠٩ خلصت الثانوية العامة، ودخلت كلية الهندسة جامعة طنطا وكان نفسي الصراحة أدخل هندسة بترول ولكن ربنا -ولله الحمد- قدر اني ما ألحقشي هندسة البترول على درجة واحدة -أنت متخيل يا صاحبي- والحمد لله وفعلاً دا كان الخير لي ولكن الانسان إدراكه محدود.
كان نفسي أدخل قسم له علاقة بالكمبيوتر بس بسبب ضغط الأقارب والمجتمع وكان قسم مدني وقتها هو الأشهر، فدخلت قسم مدني، للأسف!
بسبب اني ماكنتش بحب الكلية أوي، وكنت لسه بستكشف عالم الانترنت وكنت مبهور جدااااا - اه، انا دخلت عالم الانترنت متأخر نسبياً- ووقتها كان المحتوى التعليمي باللغة العربية قليل أووووووي، وكنت بتعلم برامج زي الفوتوشوب وأفترايفكت من كورسات موقع ليندا وقتها اللي هو دلوقتي LinkedIn Learning.
وبعدين قلت ليه محاولش أملأ الفراغ دا وبالفعل بدأت أعمل كورس لشرح الفوتوشوب بالعربي على يوتيوب ومن هنا بدأت رحلتي مع يوتيوب.
اتخرجت والحمد لله بعد ٥ سنوات عجاف، وقعدت شوية حلوييييين، بدور على شغل كمهندس، ولأن مكانش عندي أي خبرة خالص، اتاخرت شويتين على ما لقيت شغل، احم احم، خالي كلملي مهندس قريبنا وأخدني معاه الموقع أتدرب، والحمد لله بعدها باسبوعين روحت الشغل في مرسى علم في أقصى جنوب مصر
بدأت أهتم بيوتيوب واستثمر واشتريت جرين سكرين وكاميرا وشوية اضاءة وكمان اكتشفت ان فيه ناس كتير عندها مشاكل في الانجليزي، وانا كنت كويس في الانجليزي وبحبه ومن هنا بدأت أشارك مع الناس شوية نصائح لتحسين اللغة الانجليزية ومن هنا كانت الانطلاقة.
اشتغلت مهندس مدني أو بمعنى أدق مهندس مساحة في مرسى علم، الحقيقة مرسى علم هي واحدة من أجمل الأماكن اللي ممكن تروحها عشان تستجم.
مشهور ان مرسى علم مالديف مصر لكن الحق يُقال ان المفروض يقولوا ان المالديف هي مرسى علم المحيط الهندي، حقيقي مرسى علم جميلة جدااااا ، بس للأسف أنا كنت هناك للشغل وفرق شاسع بين الاتنين.
أثناء شغلي في مرسى علم كنت بشتغل حوالي ٢٢ يوم هناك وأرجع البيت ٥ أيام، كنت في الأيام دي بصور ٤ فيديوهات في البيت وبعدين أخد الفيديوهات معايا على اللابتوب وامنتجها واعمل شغل الجرافيكس والافترايفكت وانا في مرسى علم، واللي ساعدني ان المشروع اللي كنت شغال فيه كان بيتوقف كتير.
بعد ٦ شهور في الشغل، كل يوم كنت بصحى واقعد على السرير واسأل نفسي: أنا بعمل ايه هنا؟ كل يوم نفس السؤال لمدة ١٠ شهور لحد ما فعلاً أخدت القرار اني هسيب الشغل والقرار دا ماكانش لحظي، لا، انا هريت الموضوع دا تفكير واحتمالات لحد ما توكلت على الله وسبت الشغل وبقيت Full-Time YouTuber والكلام دا قبل ما يبقى مصطلح يوتيوبر مشهور او معروف.
الحمد لله دلوقتي، أقدر أقول ان دا أفضل قرار اخدته في حياتي، والموضوع فرق بشكل أنا ماكنتش أقدر أتصوره بصراحة، القناة بدأت تكبر رويدًا رويدًا والمحتوى تطور من الانجليزي لفيديوهات عن المذاكرة والانتاجية وإدارة المهام وتنظيم الوقت والطاقة.
تنوع المحتوى، ساعد في وصول قناة دروس أونلاين لعدد كبير من المتابعين لحد ما وصلنا ولله الحمد قرب ٧ مليون مشترك.
في ديسمبر ٢٠٢٤ اتعلن إن أخوكم العبدلله اتختار ضمن آخر ١٠ مرشحين لجائزة المليون دولار من قمة المليار متابع في دبي، من بين حوالي ١٦ ألف صانع محتوى اتقدموا من ١٩٠ دولة. كمية الحب والدعم اللي لقيتها الأيام دي كانت حاجة مش طبيعية، حب يكفي الواحد بقية حياته، الحمد لله.
بعدها بأيام قليلة، وفي بداية يناير ٢٠٢٥، اتقبض عليّ واتوجهتلي تهمة الاتجار في النقد الأجنبي، بسبب فلوس كنت ساحبها من حسابي في البنك. الفلوس دي كانت أرباح القناة، ووصلت بتحويلات بنكية رسمية. وطبعًا خرجت من مسابقة القمة.
في فبراير خرجت، وفي ١٥ مارس ٢٠٢٥ المحكمة الاقتصادية في طنطا حكمت ببراءتي، لأن الفلوس طلعت من مصادرها الشرعية. كانت تجربة صعبة جدًا عليّ وعلى أهلي، بس الحمد لله على كل حال، وشكرًا لكل واحد وقف جنبي.
بعد حوالي ٨ شهور بعيد، رجعت أعمل محتوى تاني. أنا دلوقتي في الإمارات لأنها أنسب مكان لشغلي، ومتنقل بينها وبين مصر، ومصر هتفضل بلدي.
محكمة القضاء الإداري حكمت بشطب اسمي من السجلات ورفع كل الآثار اللي اترتبت على القضية. القضية خلصت رسميًا، ورجعنا نركز في اللي بنحبه.
النهارده بقينا أكتر من ١٦ مليون متابع على كل المنصات، ولسه الهدف زي ما هو من أول يوم: محتوى تعليمي بالعربي يفرق في حياة الناس. والجاي أحلى إن شاء الله.
للتعاون والرعايات والاستفسارات، ابعتلي وهرد عليك في أقرب وقت.
